Allahverdi Şahverənov 28 yanvar 1990-cı ildə Sumqayıt şəhərində anadan olmuşdur. O, əslən Qərbi Azərbaycanın Göyçə mahalının Zod kəndindəndir. Bu qədim və zəngin tarixə malik bölgə uzun illər ərzində Azərbaycanın elm, mədəniyyət və maarif mərkəzlərindən biri olmuşdur. Məhz bu torpağın yetirməsi olan Şahverənov da öz elmi və peşəkar fəaliyyəti ilə bu irsi davam etdirir.

O, 2007-2013-cü illərdə Azərbaycan Tibb Universitetində təhsil almış, 2013-2016-cı illərdə hökumətlərarası müqavilə çərçivəsində Çin Xalq Respublikasının Huazong Elm və Texnologiya Universitetində onkologiya ixtisasında tibb üzrə doktorantura səviyyəsində təhsil alıb.

2019-cu ildə Prezident İlham Əliyevin Sərəncamı ilə Gənclər üçün Prezident Mükafatına layiq görülüb.

Bir müddət AMEA-nın Genetik Ehtiyatlar İnstitutunun İnsan genetikası laboratoriyasının müdiri vəzifəsində çalışıb.

Tibb üzrə fəlsəfə doktoru Allahverdi Şahverənov hazırda Almaniyada fəaliyyət göstərir. O, həm həkim, həm də tədqiqatçı kimi çalışaraq beynəlxalq tibb elminə töhfələr verməkdədir. 5 elmi əsəri impakt faktorlu beynəlxalq jurnallarda nəşr edilib.

Ən böyük arzusu xərçəng xəstəliyinin müalicəsini tapmaqdır. Allahverdi Şahverənov hazırda xərçəngin biologiyası, genetikası və epigenetikası üzrə tədqiqatlar aparır.

“Genetika bizdə çox məşhur anlayışdır, ancaq epigenetika o qədər də tanış deyil. Epigenetika genetika qədər çox ciddi bir sahədir, yəni genlər qaydasındadır, sadəcə, onun məlumat ötürmə sistemlərində, belə desək, problem var. İkinci istiqamət sidik kisəsi və yoğun bağırsaq xərçəngidir. Üçüncü istiqamət kök hüceyrələri üzrə CRISPR/Cas9 redaktə sisteminin tətbiqi ilə bağlıdır. Hələlik bu sistemi tam tətbiq etmişik deyə bilmərəm, ancaq tətbiq etməyə başlamışıq. Bunun da uzun mərhələləri var. Bu sahədə Ukrayna alimləri ilə birlikdə talassemiya üzərində bizim yeni bir layihəmiz var. Talassemiya üzərində tədqiqatlarımız davam edir. Bununla yanaşı, yeni genin tapılması fikrimcə, ciddi uğurdur. Bizim talassemiyaya hədəflənməyimizin bir səbəbi də var. Talassemiya xəstələrinin müalicəsində sümük iliyi transplantasiyasından istifadə olunur. Gün gələcək CRISPR genom redaktə sistemi ilə talassemiya xəstələrinə sümük iliyinin köçürülməsinə ehtiyac qalmayacaq. Həmin sistem vasitəsilə anormal kök hüceyrələrində olan mutasiyaları aradan götürə, onları yenidən normal gen ilə bərpa edə bilərik. Normal işləyən, artıq funksional aktiv vəziyyətdə, heç bir patologiyası olmayan kök hüceyrəsini yenidən həmin xəstəyə köçürüb, bununla da həmin xəstəyə qan köçürməyə, onu kök hüceyrə transplantasiyasına məruz qoymağa ehtiyac olmayacaq bir sistemi burada tətbiq etməyə çalışırıq. Bu da bizim 4-cü sahəmizdir”, - deyə gənc alim bir müddət öncə mətbuata açıqlamasında bildirmişdi.

Daha ətraflı videomaterialda: