Çin Pekində keçirilən ən böyük Hərbi Qələbə Günü paradında yeni LY-1 yüksək güclü lazer silahını təqdim etdi və bu sistem ilk dəfə rəsmi olaraq nümayiş etdirildi.

Paradda sərgilənən quru versiyasının ölçüsü daha böyük enerji blokları üçün yer olduğunu göstərir və bu da daha yüksək çıxış gücü potensialına işarə edir.Yeni sistem səkkiz təkərli HZ141 maşınına yerləşdirilib, lakin lazerin müdafiə məqsədli istifadəsi vurğulanıb.

Qülləsində hədəfləmə üçün kiçik elektro-optik və infraqırmızı sensorlarla dəstəklənən böyük bir işıq çıxışı var, qutuşəkilli modulda isə radar və passiv radio tezliyi sensorları yerləşdirilib.

Ənənəvi müdafiə raketlərindən fərqli olaraq, LY-1 yalnız daxili gücdən istifadə edir və bu da aşağı xərcli döyüşlər və demək olar ki, limitsiz atış imkanı təmin edir.

Çinin “Global Times” qəzetində verilən məlumata görə: “LY-1 enerji blokları üçün kifayət qədər sahəyə malikdir, yəni daha yüksək gücə çata bilər və bu sayədə yalnız pilotsuz avadanlıqların hücumlarını deyil, həm də gəmi əleyhinə raketləri çox aşağı xərclə qarşısını ala bilər. Gəmidə istifadə edilən lazer silahları isə düşmən silah və avadanlıqlarının optik sensorlarına effektiv şəkildə zərər verə bilər”.

Çinin LY-1 dəniz lazerinin təqdimatı yüksək enerjili lazer sistemləri üçün uzun müddətdir mövcud olan həddindən artıq qızma probleminin həllində irəliləyiş əldə edildiyini göstərə bilər. 2023-cü ildə çinli tədqiqatçılar lazer soyutma texnologiyasında mühüm bir irəliləyiş əldə etdiklərini və bunun istilik bloklanmaları olmadan davamlı işi mümkün etdiyini bildirmişdilər.

LY-1 birbaşa bu irəliləyişlə bağlı olmasa da, onun təqdim olunması bu yeniliklərin artıq tətbiq edilə biləcəyinə işarə edir.Hərbi ekspertlərə görə, lazerin dizaynı davamlı və yüksək güc çıxışına yönəlib və təkmilləşdirilmiş soyutma sistemi uzunmüddətli döyüşlərdə lazerin performansını sabit saxlayacaq. Bu isə dəniz qüvvələrinin pilotsuz uçuş aparatları və yaxınlaşan raketlərə qarşı müdafiəsi üçün kritik amildir.