✕
Strateji Elmi Tədqiqatlar Mərkəzi “Görkəmli alimlər” rubrikası çərçivəsində xalqımızın yetişdirdiyi alimlərimizin həyatı, elmi və təşkilati fəaliyyətini ictimaiyyətə təqdim edir.
Məlikov Arif Cahangir oğlu
Məlikov Arif Cahangir oğlu 13 sentyabr 1933-cü ildə Bakı şəhərində anadan olmuşdur.
1958-ci ildə Üzeyir Hacıbəyov adına Azərbaycan Dövlət Konservatoriyasını Qara Qarayevin bəstəkarlıq sinfi üzrə bitirmiş, 1979-cu ildə professor elmi adını almışdır. A.Məlikov uzun illər Azərbaycan Dövlət Konservatoriyasında müəllimlik etmiş, böyük bəstəkarlar nəsli yetişdirmişdir. 1982-ci ildən ömrünün sonunadək Azərbaycan Dövlət Konservatoriyasında bəstəkarlıq kafedrasının müdiri olmuşdur. 2001-ci ildə AMEA-nın müxbir üzvü, 2014-cü ildə həqiqi üzvü seçilmişdir.
Tanınmış bəstəkarın yaradıcılığı geniş və çoxşaxəlidir. Onun ecazkar musiqisi yalnız Azərbaycanda deyil, bütün dünyada şöhrət qazanmışdır. Görkəmli türk şairi Nazim Hikmətin librettosu əsasında yazdığı ilk böyük əsəri olan “Məhəbbət əfsanəsi” baleti Arif Məlikova dünya şöhrəti “Əlibaba və qırx quldur” (1973), “İki ürək dastanı” (1981), “Yusif və Züleyxa” baletlərini (1999), “Simfoni”Axırıncı aşırım”, “Qəhrəmanı” Xalq Çalğı Alətləri Orkestri üçün 7 saylı Simfoniya (1995), Simfonik orkestr üçün “Azərbaycan” balladasını (1995) yazmışdır. Nazim Hikmətin sözlərinə 2 vokal silsilə, “Dalğalar” operettasını bəstələmişdir (1967). “Sehrli xalat” (1964), “Məhəbbət əfsanəsi” (1969), “Axırıncı aşırım” (1971), “Ulduzlar sönmür” (1971), “Rüstəm və Söhrab” (1971), “Ürək məsələləri” (1971), “Qərib cinlər diyarında” (1977), “Qız Qalası əfsanəsi” (1978), “İşarəni dənizdən gözləyin” (1986), “Doğma sahillər” (1989), “Kitabi-Dədə Qorqud. Səgrəyin dastanı” (1990), “Göylər sonsuz bir dənizdir” (1995), “Heydər Əliyev. Dördüncü film. Lider” (1999), “Tanrıya tapınan Kiş” (2001), “Hacı Qara” (2002), “Kitabi-Dədə Qorqud. Basat və Təpəgöz” (2003), “Mayestro Niyazi” (2007) və sair filmlərin musiqisini bəstələmişdir.
A.Məlikov Azərbaycan Respublikasının “Əməkdar İncəsənət Xadimi” (1965), Azərbaycan Respublikasının “Xalq artisti” (1978), SSRİ “Xalq artisti” (1986) fəxri adlarına layiq görülmüşdür. Azərbaycan mədəniyyətinin inkişafında müstəsna xidmətlərinə görə “Şərəf nişanı” (1971), “İstiqlal” (1998), “Heydər Əliyev” ordenləri (2013) ilə təltif olunmuşdur. Azərbaycan Respublikasının Dövlət Mükafatı laureatıdır (1986).
2013-cü ildən Xəzər Universitetinin fəxri doktoru seçilmişdir.
Akademik Arif Məlikov 2019-cu ildə Bakı şəhərində vəfat etmişdir.