✕
Strateji Elmi Tədqiqatlar Mərkəzi “Görkəmli alimlər” rubrikası çərçivəsində xalqımızın yetişdirdiyi alimlərimizin həyatı, elmi və təşkilati fəaliyyətini ictimaiyyətə təqdim edir.
Cavadzadə Mir-Məmməd Cavad oğlu
Cavadzadə Mir-Məmməd Cavad oğlu 18 may 1927-ci ildə Lənkəran şəhərində anadan olmuşdur. Azərbaycan Dövlət Tibb İnstitutunun Müalicə-profilaktika fakültəsini bitirmişdir (1948).
M.Cavadzadə 1954-cü ildə Moskvada “Sidik axarının daşları” mövzusunda tibb elmləri üzrə namizədlik, 1962-ci ildə Leninqradda “Böyrəklərin polikistozu” mövzusunda tibb elmləri üzrə doktorluq dissertasiyalarını müdafiə etmiş, SSRİ Tibb EA-nın müxbir üzvü (1974), AEA-nın həqiqi üzvü (1980) seçilmişdir.
M.Cavadzadə Astara rayon xəstəxanasında həkim və Cərrahiyyə şöbəsinin müdiri (1948-1950), Krım Tibb İnstitutunda (Simferopol) assistent, dosent (1954-1957), II Moskva Dövlət Tibb İnstitutunda Urologiya kafedrasında assistent, professor (1957-1963), Azərbaycan Dövlət Həkimləri Təkmilləşdirmə İnstitutunda kafedra müdiri (1963), direktor (1975-2008) vəzifələrində çalışmışdır.
M.Cavadzadə respublikada çoxsaylı uroloji istiqamətlərin əsasını qoymuşdur. Onun elmi fəaliyyəti urologiya və operativ nefrologiyanın istiqamətləri: anesteziologiya, böyrək çatışmazlığı, onun patogenezi, konservativ və fəal müalicəsi, uşaq uronefrologiyası, urologiyada damar tədqiqatları və nefrogen hipertenziya problemləri, yeni diaqnostika və müalicə üsullarının işlənib hazırlanması ilə bağlı olmuşdur.
M.Cavadzadə əksəriyyəti xarici ölkələrdə nəşr olunmuş 700-ə yaxın elmi əsərin, o cümlədən 32 monoqrafiya və dərs vəsaitinin müəllifidir.
Alimin elmi rəhbərliyi və məsləhətçiliyi ilə 65 fəlsəfə doktoru və 15 elmlər doktoru hazırlanmışdır.
M.Cavadzadə Azərbaycan SSR Ali Sovetinin 2 çağırış deputatı, Azərbaycan Respublikası Səhiyyə Nazirliyinin baş uroloqu olmuş, “Azərbaycan Tibb jurnalı”nın, “Urologiya və nefrologiya” jurnalının redaksiya heyətinin üzvü, Beynəlxalq və Avropa Uroloqlar cəmiyyətlərinin həqiqi üzvü, Purkine adına Tibb cəmiyyətinin, Bolqarıstan Uroloqlar cəmiyyətinin fəxri üzvü, RTEA-nın Urologiya üzrə Elmi və Problem şuralarının üzvü seçilmişdir.
Alimin fəaliyyəti dövlət və ictimaiyyət tərəfindən yüksək qiymətləndirilmişdir. O, “Əməkdar elm xadimi” (1968) fəxri adına layiq görülmüş, “Şərəf nişanı” (1971), “Oktyabr inqilabı” (1981), “Lenin” (1987) və Azərbaycan Respublikasının “Şöhrət” (1997) və “İstiqlal” (2007) ordenləri ilə təltif olunmuşdur.
Akademik Mir-Məmməd Cavadzadə 2008-ci ildə Bakı şəhərində vəfat etmişdir.